Məqalələr: Texniki məsələlər və onların həllləri

Cihazların İP ünvanının müəyyən edilməsi

İP ünvanı nədir və nə üçün lazımdır?

İP ünvanı (Internet Protocol Address) internetə və ya yerli şəbəkəyə qoşulan hər bir cihazın unikal ünvanıdır — cihazın şəbəkədəki "identifikasiya nömrəsi". Bu ünvan vasitəsilə cihazlar bir-birini tanıyır və öz aralarında məlumat mübadiləsi edə bilir.

Clopos istifadəçiləri üçün cihazın İP ünvanını bilmək bir neçə səbəbə görə vacibdir:

E-kassa inteqrasiyası — Omnitech, AzSmart, Caspos, OneClick və digər e-kassa cihazlarının Cloposa qoşulması üçün cihazın İP ünvanını daxil etmək tələb olunur.
Şəbəkə printerinin sazlanması — çek və matbəx printerlərinin Cloposla düzgün əlaqə qura bilməsi üçün onların İP ünvanı lazımdır.
Statik İP rezervasiyası — İP ünvanını router tərəfindən rezerv etmək üçün onun nə olduğunu bilmək vacibdir (əks halda ünvan dəyişdikdə cihaz sistemdən düşür).
Texniki dəstək və diaqnostika — problem yaşandığı halda dəstək komandası cihazın İP ünvanını soruşa bilər.

Bu məqalədə fərqli cihazların — Clopos satış terminalı, Windows kompüter və mobil telefonun — İP ünvanının necə müəyyən ediləcəyi izah olunur.

1. Clopos satış terminalında İP ünvanının tapılması

Clopos proqramının daxili alətləri ilə terminalın İP ünvanını, həmçinin şəbəkəyə qoşulu olan bütün digər cihazların (terminallar və printerlər) İP ünvanlarını asanlıqla görmək mümkündür.

Clopos proqramına PIN kodunuzu daxil edərək daxil olun. Əsas ekranın yuxarı sağ küncündə yerləşən wifi işarəsinə klikləyin.

Açılan Status pəncərəsində cihazınızın İP ünvanı sol tərəfdəki məlumat panelində "İP" başlığı altında göstərilir. Həmçinin bu pəncərədə filialda qoşulu olan bütün terminalların və printerlərin İP ünvanlarını, onların aktiv olub-olmadığını, MAC ünvanlarını və digər şəbəkə məlumatlarını görə bilərsiniz.

💡 Tövsiyə: Status pəncərəsindəki İP ünvanının yanında yerləşən kopyala işarəsinə klikləyərək ünvanı yaddaşa köçürə bilərsiniz. Bu, e-kassa və ya printer inteqrasiyası zamanı ünvanı əl ilə yazmaq ehtiyacını aradan qaldırır.

2. Windows kompüterdə İP ünvanının tapılması

Windows əməliyyat sistemində İP ünvanını Command Prompt (cmd) vasitəsilə tez və dəqiq şəkildə müəyyən etmək olar.

Windows-un axtarış panelində "command prompt" (və ya qısaca "cmd") yazın və axtarış nəticəsində görünən Command Prompt tətbiqinə klikləyərək onu açın.

Açılan qara pəncərədə — Command Prompt terminalında — kursor mövcud yerə ipconfig əmrini yazın və Enter düyməsinə basın.

Əmr icra olunduqdan sonra pəncərədə kompüterinizin şəbəkə adapterləri və onlara aid məlumatlar sıralanacaq. Qoşulu olduğunuz şəbəkə (adətən Wireless LAN adapter WiFi və ya Ethernet adapter) bölməsində "IPv4 Address" sətrinin qarşısında göstərilən rəqəmlər (məsələn: 192.168.1.58) sizin kompüterinizin İP ünvanıdır.

💡 Əgər kompüter həm Wi-Fi həm də kabel (Ethernet) ilə şəbəkəyə qoşuludursa, hər iki adapterin İP ünvanı göstəriləcək. Aktiv istifadə etdiyiniz bağlantının IPv4 ünvanını götürməyə diqqət edin.

3. Mobil telefonda İP ünvanının tapılması

Android əməliyyat sistemli mobil telefonlarda İP ünvanını Wi-Fi parametrləri üzərindən görmək mümkündür. Aşağıdakı addımlar Samsung cihazları üçün göstərilmişdir, lakin digər Android markalarında da addımlar oxşardır.

Telefonun ekranında Parametrlər (Settings) tətbiqini açın.

Açılan siyahıdan Bağlantılar bölməsini seçin.

Daha sonra Wi-Fi bölməsinə keçid edin.

Cari şəbəkə başlığı altında qoşulu olduğunuz Wi-Fi şəbəkəsinin adını görəcəksiniz. Həmin şəbəkənin qarşısındakı dişli çarx (parametrlər) işarəsinə klikləyin.

Açılan şəbəkə detalları səhifəsinin aşağı hissəsində Daha çoxuna bax (və ya View more) seçiminə klikləyin.

Ekranı aşağı sürüşdürdükdə İP ünvanı başlığı altında göstərilən rəqəmlər (məsələn: 192.168.1.59) telefonunuzun İP ünvanıdır.

💡 iPhone (iOS) cihazlarında İP ünvanı oxşar qaydada Ayarlar → Wi-Fi → şəbəkənin yanındakı "i" işarəsi ardıcıllığı ilə tapılır.

Tez-tez verilən suallar ilə bağlı məqalələr

Yeniləndi: 17/04/2026

Bu məqalə faydalı oldu?

Təşəkkürlər!